Danny diejalékt - Lómmëlsën Tóóvërdrank

‘k Hém dë zeuj. Wirral. Gë ként dè wöl, van die zoewër oprispingskës ien dë slókdèrrëm. En as ëk zég “slókdèrrëm”, dan is dè ien mé gëval zee’ër niej óóvërdreevën. ‘k za óuwët toch ës moetë leejërë va wa traagër të èètën, want ‘k zén në sló’ër jéstë klas, zee’ër as ‘t lè’ër is. Vandaag eest përtang van dën drank, dor gòn wë nie flààw óóvër duun. Caava. Dor haa ‘k nöö ienjéns goesting ien. En dan kap ik ër dè veul en veuls të rap ien, lék limmënaat bëkans. Lék Regi. ‘k Hém mé lauwëtë wijsmaa’ën dè diejë groewëtgëtrò’ën is mi caava ien dë plak van mèllëk va Milk Inc. ‘k Weet nie ofdè ‘t wor is, mè gë ziegët ër èn. Caava en pjöj’ës, déénk, as gë zén taan bëkékt.

Wa wauwëtër ien mé gëziecht spréng’ëlën en wa öteejën rössën mi ë waslèpkën. E zjéfvöddë’ën, zoas d’ààw ginnërassie za zéggën. Dè hölpt. Në miens mut zówiezówwë wa proopër zén óp zën èègë. As g’öw èègë èvvë’ës wa löt hangë, zéddë në völlap veurdè gë’r èrrëg ien hét. ‘k Spring mè meej ien dën doesj ók, want mén oksëls hémmën ók óuwët veulë bèètër gëroo’ën. Mómmënteejël rui’ë zë na dë gruuntësoep va jérgiestërën of van nog wa langër gëleejën. Dè heujërt nie zó të zén. Goesting ien soep zaddër ien allë gëval nie va krijgën. Ik al gans niej. Allé jaa, ë goej vèrrë’ë frèt allës, mè ‘t is zee’ër nie zówwë dè ‘k allë daag mén soep gëhad mut hémmën. ‘k Zén zó génnë soepboewër, lék as zë zéggën. Jan Soep ien dën tijd jaa, dè was në soepboewër. Sauwëtërdaags dë këstrol óppë brievëbus en Jan kaptë zë mi allë plëzier vól. Hinnësoep of tëmattësoep was ‘t ien ‘t wiekénd alté.Die ha ‘k allëbèèj gèèrën en ‘k slóktë diej al èffë rap na binnën as diejë caava van tëstrak. En dénkt mè niej dè ‘k dor dë zeuj va kreeg. Jan kéndë zé vak. Soep maa’ë nóndëdzjuuj en liefst goe gëzaatën. Jan Soep öt dë Leepëlstrauwët, zówiet kundë gëwóuwën zèllëf niej ötvijnën. Vruugër zén ik mi ‘t schóuwël óuwët ien zën keu’ë meugë gòn zien. ‘k Waar óndër dën iendruk, dè meugdë gërust weetën. Dor stónnën allëmòl groewëtë, bling’ëndë keetëls die mé èn diejë gààdkleurëgë pot va Panoramix, dën druïdë öt dë buuk van Astërix, deen déng’ën. Diejë maktën dor tóóvërdrank ien, zódèèn dë Galliejërs ónvërslònbauwër wóuwërën. Zówwë fantëseejërdën ëk dè Jan Soep allë wiekénds na ‘t voetbalplein va Lommël SK reej en dor dë speulërs ë pauwër tëlóuwërë soep góóf zódèèn zë zee’ër zaan winnën. Meejëstal deen zë dè ók en was Jan soep ménnën héld. Lómmëlsën tóóvërdrank, dè was Jan zén soep, dócht ëkik as klèè mènnë’ën.

Vur Regi is diejë zeuj-vëróuwërzaa’ëndë caava óngëtwéffëld zénnën tóóvërdrank. Dordur hi iej zénnën hit “Walk on Water” warschénlëk óuwët kunnë maa’ën. ’t Is mè wor në miens ien gëleujëft, want as diejë Regi za prëmbeejërë van ècht óóvër ‘t wauwëtër të loopën, zaaj gààw mi zën klitsën en zën klatsën èn ‘t wauwëtërtrappëlë gòn en al èffë zèèknat zén as ëkik nööw. ‘k Za mèr ës gààw nën handdoek pa’ën en mën èègë wa afdreujëgën. ‘k Hém al veuls të lang ien diejën doesj gëstòn óndërtussën, mi al dè gëpra’ëzeejër óóvër dittëntgeen.