Blijvë zittën

As ëk nën Hóllandër gëweest wààr, zóuwët ëk nuiw óp “de bank”. As Lómmëlèèr zit ëkik dus gëwóuwën ien ménnë zèètël. Dè’s mè goed ók, want gèld hém ëk toch niej en dörbé: próbeejërt mèr ës ‘n bank të zuuj’ën wordè gë zómè binnë meugt um wa të zittën. En flappëtappën (gèld afhauwëlën) is bënàà onmeugëlëk teegëworrëg. Ik gèèf ët öw të duun! Mèjè, zówas ëk al zi: ‘k hém ës toch gén óp dë rèè’ëning stòn. Nie dè ‘k ës ien ménnë matras hém zittën of zóuwë, want dè ‘s ók gén óplossing! Gë kunt öw gèld mè bèètër ópduun, dan héddë veulë mindër miezirrie. Ienbrèè’ërs, hòlt öllie niks ien ölliejë kop: bé ós vélt niks të hauwëlën. As zjuust në fèrrëmë zèètël. Dè hémmëw. Nën hoeksalón.

“Ik noem ‘m niet mijn bank, maar wel mijn hoofdzetel,” zi ‘kik óóvërlést teegë nën Hóllandsë kammërauwëd, umdè ‘k ër alté gòn zittën as ëk moet nààdéng’ën of inspierassie nóuwëdëg hém. Andër miensë zààn ër mësschien “canapé” teegë zéggën, mè vur mé klingt dè të slààpërëg. Ik heujër dor ‘t Éngëls “to nap” ien. Kort wa slààpë zógëzeed, of “dutten”, mè dè vijn ëk dan zo trutèchtëg kling’ën. Dè ‘s niks vur mé ók nie, in ‘t middë van dën dag zówa liggë të maffën. Neejë, dauwër zén ëk të jónk en të actief veur.

Alhoewöl, gë moes diejën hónd hiejër langs mé ës zien liggën. Alté as ëkik ien ménnë zèètël, óp mé plèkskë zit, kumt zë teegë mé èn liggën. Zó zààn meejër vrààwë moetë zén, allé, dë schòn toch.

Zë zéggën alté dè báskës en huisdiejërën óp mëkandërë tré’ën en dè is óp heejël veul vla’ën ók zóuwë: wë hémmën allëbèèj giegantissë óuwërën die wijd van ózzë kop afstòn, wë zààn allës duun vur wa goei èètën en as wë dë kans krijgë, zittë wë èn ós èègë gëslachsdeejëlën të lè’ën. Allé ja, vural dën hónd dan, want zèllëf zén ëk dor bëlangë nie leenëg gënoeg veur. Dzjuu toch, ik mut wa gòn ópléttën, andërs weujërdt dittë wir zó nën tékst worvan dè gë hópt dè die van ós nie meejlèèst.

Diejën hónd diejë zörrëgt ër dus veur dè ‘kik kallëm wèjjër en óp die maniejër kom ëkik meejëstal tot goei dénkrizzëltauwëtën of inspiereejërëndë gëdààchtën. ‘t Is nuiw dè ‘k ërvan mut proffëteejërën, want strak zit ‘t hiejër wir vól jóng en eest nog zjuust gé vèchtës um plak të hémmën. Dan wullë zë hun prógramkës zien óp dën tillëvieziej, lék as “Dëm Buurtpólies”. Vijn ëk dè èrrëg? Neejët, want ien d’ààw afleevëringë spult ër jénnë meej diejën avvëntoe plat Lómmëls pröt (Henny Seroeyen as Robin). En dè óp dë nasjónauwëlën tillëvieziej, óp VTM! Wa në schònë rëclààm vur ós Lómmëls diejalékt! En wa në schònë gëspiejërdë miens ók! Diejën is gëtrénd tot en mèt. Dè mag gërust gëzeed wèjjërën. Èègëlëk feitëlëk za ‘kik bèètër ók wa gòn duun ien dë plak van hiejër wa ien ménnë zèètël të zittën en të wochtën óp inspierassie, want óp deezën èègëstë mómènt zien ëkik ër óngëveejër èèvë gëspiejërd öt as ménnë stieló. Of as ‘n vielópómp. Hiejër ien dë buurt zéggë zë ók wöl ës “gëspiejërdë freinkààbël” teegë mé. Dè is kwètsënd, mèjè, wa duudë‘rèn? Gòn fitnëssën? Dör gòn ëk jést ës tëgoei óóvër pra’ëzeejërën ien ménnë zèètël, of wa haddë gëdócht!

Danny VANDENBERK